ASL Wayne va Massa O‘zbekiston bo‘ylab o‘tkaziladigan “ULTIMATE TOUR 2026” gastrol safari oldidan matbuot anjumani tashkil etdi.
Unda prodyuser Aziz Tulkin, Massa va Mubinlolo konsert dasturi va loyihaning asosiy maqsadi haqida ma’lumot berdi. Ularning ta’kidlashicha, ushbu gastrol safari oddiy konsertlardan farq qiladi va tomoshabinlarga keng ko‘lamli audiovizual shou taqdim etiladi.
Matbuot anjumanida ma’lum qilinishicha, tur doirasida ASL Wayne va Massa bilan birga “Harmoney Music” leyblining Mubinlolo, Doxxim, AbroBey, Minor va boshqa ijrochilari ham sahnaga chiqadi. Shuningdek, har bir shaharda tomoshabinlar uchun maxsus mehmon san’atkorlar ham tayyorlangan.
Bundan tashqari “ULTIMATE TOUR 2026”ning asosiy maqsadi O‘zbekistonda konsert industriyasini rivojlantirish hamda viloyatlardagi muxlislarga ham poytaxt darajasidagi tomoshalarni taqdim etishdan iborat.
Gastrol safari 17-iyul kuni Buxoroda start olib, Navoiy, Samarqand, Guliston, Andijon, Farg‘ona va Urganch shaharlarida davom etadi. Turnening yakuniy konserti esa 15-noyabr kuni Toshkentdagi Humo Arena’da bo‘lib o‘tadi.
