PSY 2022-yildan 2025-yilgacha boʻlgan muddat ichida Seuldagi universitet shifoxonalaridan birida shaxsan shifokor koʻrigidan oʻtmasdan, oʻzining menejeri va boshqa uchinchi shaxslar orqali “Xanax” va “Stilnox” kabi psixotrop (uxlatuvchi va xavotirga qarshi) dori vositalariga retseptlar olganlikda ayblanmoqda.
Janubiy Koreya qonunlariga koʻra, bu kabi kuchli taʼsir qiluvchi psixotrop moddalarni faqat bemorning oʻzi shaxsan shifokor qabulida boʻlib, tekshiruvdan oʻtgandan keyingina olishi mumkin. Dorilarni uchinchi shaxs orqali qabul qilib olish qatʼiyan taqiqlangan.
Seul politsiyasi mazkur holat yuzasidan surishtiruv ishlarini yakunlab, ish hujjatlarini prokuraturaga topshirgan. Tergov doirasida PSY, uning menejeri va dorilarni yozib bergan shifokor bilan birga jami 6 kishi prokuraturaga koʻrib chiqish uchun yuborilgan.
Ushbu tibbiy qonunbuzarlik uchun Janubiy Koreya qonunchiligida 1 yilgacha ozodlikdan mahrum qilish yoki 10 million von (taxminan 6,500 AQSH dollari) miqdorida jarima jazosi koʻzda tutilgan.
PSY ning agentligi xonandaning surunkali uyqusizlik va tushkunlikdan aziyat chekishini, dorilarni shifokor tavsiyasi va belgilangan dozada ichganini maʼlum qilgan. Biroq, band ish grafigi tufayli dori-darmonlarni menejeri orqali oldirgani katta xato va eʼtiborsizlik boʻlganini tan olib, uzr soʻragan va prokuratura tergovi bilan toʻliq hamkorlik qilishini bildirgan.
