BTS uzoq kutilgan “ARIRANG” albomi bilan katta sahnaga qaytdi. 20-mart kuni e’lon qilingan reliz ilk 24 soat ichida global musiqiy maydonni zabt etib, Spotify tarixida yangi rekord o‘rnatdi — u bir kunda eng ko‘p tinglangan K-pop albomiga aylandi.
Albom chiqqan zahoti Spotify global chartida bir nechta yuqori o‘rinlarni egalladi. Titul trek “SWIM” dunyo reytingida 1- o‘rinni band etdi, “Body to Body” esa 2-o‘ringa joylashdi. Ayniqsa, “Body to Body” qo‘shig‘ida an’anaviy koreys ohanglari bilan zamonaviy pop elementlari uyg‘unlashgani muxlislar tomonidan yuqori baholandi. Shuningdek, “Hooligan”, “FYA” va “Aliens” ham global top-10 ro‘yxatiga kirib, albomning umumiy muvaffaqiyatini mustahkamladi.
iTunes platformasida “SWIM” 90 dan ortiq mamlakatda chart yetakchisiga aylandi, “ARIRANG” albomi esa 88 hududda 1-o‘rinni egalladi. Janubiy Koreyada esa reliz darhol Melon va Bugs chartlarida birinchi pog‘onaga ko‘tarildi. Qizig‘i shundaki, albomdagi barcha 14 ta trek bir vaqtning o‘zida Melon Top 100 ro‘yxatiga kirdi — bu juda kam uchraydigan natija hisoblanadi.
Albom sotuvlari ham rekord darajani ko‘rsatdi. Hanteo Chart ma’lumotlariga ko‘ra, atigi bir kun ichida qariyb 3,98 million nusxa sotilgan. Bu ko‘rsatkich BTS’ning avvalgi “MAP OF THE SOUL: 7” albomining bir haftalik natijasidan ham yuqori bo‘lib, guruhning tijoriy kuchi yana bir bor tasdiqlandi.
Mutaxassislar prognoziga ko‘ra, “ARIRANG” Billboard 200 reytingida ham 1-o‘rinda debyut qilishi kutilmoqda. Agar bu tasdiqlansa, bu nafaqat BTS uchun, balki butun K-pop sanoati uchun yilning eng yirik musiqiy startlaridan biriga aylanadi.
Albom chiqqanidan keyingi kun — 21-martda guruh BTS Comeback Live: ARIRANG nomli katta konsertni Gwanghwamun Square maydonida o‘tkazdi. Taxminan 104 ming tomoshabin yig‘ilgan ushbu tadbir Netflix orqali 190 mamlakatda jonli efirda namoyish etildi. Bu esa BTS’ning global auditoriyasi qanchalik keng ekanini yana bir bor ko‘rsatdi.
“ARIRANG” — guruh a’zolari harbiy xizmatni to‘liq yakunlaganidan keyingi ilk to‘liq studiyaviy albom bo‘lib, unda 14 ta trek jamlangan. Albomda klassik koreys motivlari, zamonaviy pop, hip-hop va elektron musiqaning uyg‘unligi kuzatiladi, bu esa uni nafaqat tijoriy, balki ijodiy jihatdan ham muhim loyiha sifatida ajratib turadi.
Endilikda BTS Nyu-Yorkda katta sahnaga chiqishni rejalashtirmoqda, undan so‘ng esa keng ko‘lamli jahon turini boshlashi kutilmoqda.
