Kino olamidagi eng nufuzli tadbirlardan biri bo‘lgan “Oskar” mukofotlari translyatsiyasi yangi bosqichga ko‘tarilmoqda. Kino san’ati va fanlari akademiyasi e’loniga ko‘ra, 2029-yildan boshlab “Oskar” taqdirlash marosimi YouTube platformasi orqali jonli efirda namoyish etiladi. Bu qaror yarim asrdan ortiq vaqt davomida marosimni uzatib kelgan ABC telekanali bilan hamkorlik yakunlanayotganini anglatadi.
Ma’lum qilinishicha, ABC telekanali “Oskar” marosimini 2028-yilgacha efirga uzatishda davom etadi. Shundan so‘ng, 2029-yildan boshlab YouTube global translyatsiya huquqlariga ega bo‘ladi va ushbu huquqlar 2033-yilgacha amal qiladi. Eng muhim jihati shundaki, mukofotlash marosimi butun dunyo tomoshabinlari uchun bepul tarzda namoyish etiladi.
Bu o‘zgarish an’anaviy televideniye davridan raqamli platformalar davriga o‘tishning yaqqol namunasi sifatida baholanmoqda. YouTube bugungi kunda milliardlab foydalanuvchilarga ega bo‘lib, kontentni istalgan joy va istalgan qurilmadan tomosha qilish imkonini beradi.
YouTube bosh direktori Nil Mohan ushbu hamkorlikni izohlar ekan, “Oskar” mukofotlarini muhim madaniy institut deb atadi. Uning ta’kidlashicha, Akademiya bilan hamkorlik san’at va kino bayramini dunyo bo‘ylab yanada kengroq auditoriyaga yetkazadi hamda yangi avlod ijodkorlari va kino ixlosmandlarini ilhomlantiradi.
Akademiya rahbariyati ham bu qarorni ijobiy baholab, YouTube orqali translyatsiya “Oskar” mukofotlarining xalqaro miqyosdagi ta’sirini kuchaytirishini, ayniqsa AQShdan tashqaridagi tomoshabinlar sonini oshirishini qayd etdi.
Bundan tashqari, bepul translyatsiya formati tomoshabinlar sonining keskin oshishiga olib kelishi mumkin. Bu esa “Oskar” mukofotlarining global nufuzini yanada mustahkamlab, kino san’ati targ‘ibotiga yangi imkoniyatlar yaratadi.
