Maqolada ta’kidlanishicha, Di Kaprioni o‘z tengdoshlari orzu qiladigan darajada yorqin va sermahsul karyera yaratgan. Uning ilk katta yutug‘i bo‘lgan 1993-yilda suratga olingan “Bu bolaning hayoti” filmidagi ijrosi yosh bo‘lishiga qaramay, tanqidchilarni hayratga solgan va aktyorning kelajakdagi ulkan salohiyatidan darak bergan.
Nashr, shuningdek, uning qandaydir charchoq bilmaydigan, kameralar oldida hamisha tetik va jozibali ko‘rinadigan chehrasini alohida ta’kidlaydi.
Bugungi kunda 51 yoshni qarshilagan Di Kaprio 50 ga yaqin filmlarda rol ijro etgan. Uning ijodi orasida “Omon qolgan” filmi alohida o‘rin tutadi — aynan shu asar unga kutilgan “Oskar” mukofotini olib kelgan. Shuningdek, aktyor “BAFTA”, “Oltin globus”, “Kumush ayiq” kabi nufuzli mukofotlar sohibi hamdir.
Aynan shunday iste’dod, mehnat va o‘ziga xoslik Leonardo Di Kaprioni bugungi kunda ham jahon kinosining eng yorqin siymolaridan biri sifatida tanilishiga sabab bo‘lmoqda.
