Manxettenning gavjum chorrahasida AQSh prezidenti Donald Trampning kanalizatsiya lyukidan chiqib kelayotgandek tasvirlangan yorqin qizil haykali paydo bo‘ldi. Lyuk qopqog‘i yonida kichkina qizg‘ish kalamushni ham ko‘rish mumkin.
“Donald” deb nomlangan haykal fransuz ko‘cha ijodkori Jeyms Kalomina tomonidan yaratilgan. U Instagaram sahifasida aynan shu haykal rasmi ostiga:
“Qo‘rquv, bo‘linish va axloqiy buzuqlik hokimiyat quroli sifatida ishlatilgan davrning timsoliga aylangan siyosiy arbob tasviri.” – deya izoh qoldirgan.
Mahalliy aholi va sayyohlar diqqatini tortayotgan haykal ijtimoiy tarmoqlarda katta muhokamalarga sabab bo‘ldi. Kimdir uni “siyosiy istehzo” sifatida qabul qilsa, boshqalar “zamonaviy san’atning jasur ifodasi” deb baholamoqda.
