Warner Bros. “Uzuklar hukmdori: Gollumni ovlash” (The Lord of the Rings: The Hunt for Gollum) filmining suratga olish ishlari rasman boshlanganini e’lon qildi. Shu bilan birga, studiya Gollum obraziga yana qaytgan Endi Serkis ishtirokidagi ilk sahna orti videolavhasini ham taqdim etdi.
Filmda Endi Serkis nafaqat uzukka mukkasidan ketgan Gollum (Smeagol) obrazini yana gavdalantiradi, balki loyiha rejissyori sifatida ham ishlamoqda. Suratga olish ishlari Yangi Zelandiyada olib borilmoqda. Shuningdek, loyiha Serkisni afsonaviy trilogiyalar mualliflari — Piter Jekson, Fran Uolsh va Filippa Boyens bilan yana birlashtirdi. Filmda Ian Makkellen (Gandalf), Elayja Vud (Frodo) va Li Peys (Qirol Tranduil) o‘z rollariga qaytadi. Shuningdek, aktyorlar tarkibiga Keyt Uinslet, Jeymi Dornan, Leo Vudoll va Anya Teylor-Joy ham qo‘shilgan.
«Uzuklar hukmdori: Gollumni ovlash» filmining jahon premyerasi 2027-yil 17-dekabrga rejalashtirilgan.
