Krishtianu Ronaldu 9 yillik sevgilisi Jorjina Rodriges bilan qachon oila qurishi haqidagi savolga javob berdi
Krishtianu Ronaldu, sevgilisi Jorjina Rodriges bilan qachon oila qurishini ochiqchasiga e’lon qildi. 40 yoshli portugaliyalik futbolchi, 31 yoshli ispan sevgilisi bilan 2016-yildan beri birgalikda yashab keladi. Ularning 7 yoshli Alana va 2 yoshli Bella ismli ikki qizaloqlari bor. Bundan tashqari, Ronalduning surrogat ona orqali dunyoga kelgan uch nafar farzandi ham bor.
Juftlik hech qachon nikohlanganliklarini ommaga e’lon qilmagan.
Netflix’dagi “Men Jorjina” realiti-shousida intervyu bergan Jorjina Rodriges do‘stlarining qachon turmush qurishi haqidagi savollar bilan hazillashishlarini aytib o‘tgan.
Krishtianu Ronaldu bir necha bor “to‘g‘ri vaqt kelganda” va hayotlaridagi barcha narsalar joyiga tushganda Jorjina Rodriges bilan oila qurishini aytgan. Daily Mail’ning xabariga ko‘ra, Ronaldu: “Bir yil ichida, olti oy ichida yoki bir oy ichida bo‘lishi mumkin. Bu amalga oshishiga 1000 % ishonaman”, deb ta’kidlagan.
Krishtianu Ronaldu, Jorjina Rodrigesning tug‘ilgan kuniga bag‘ishlab, “Onam, sevgilim, do‘stim, rafiqam… Tug‘ilgan kuning muborak, sevgilim. Yorituvchi nurimizsan va sevging bizga kuch beradi” deb xabar yozgan. Ronaldu avvallari ham Jorjinaga “rafiqam” deb murojaat qilgan. Dekabr oyida Dubayda o‘tkazilgan 2024-yilgi Jahon Futbol Mukofotlarida ikki bora taqdirlanganida, “Bu kubokni yutish katta zavq. Eng katta o‘g‘lim shu yerda, rafiqam Jorjina ham shu yerda,” degan edi.
