Italiyalik produser Andrea Iervolino moda afsonasi Jorjo Armani haqida biografik film tayyorlamoqda. Kinorejissyorning aytishicha, bu film barcha italiyaliklar uchun faxr manbaiga aylanadi.
“Lamborgini: Inson-afsona”, “Ferrari” filmlarini suratga olgan Andrea Iervolino moda giganti Jorjo Armani haqida biografik filmni e’lon qildi. Produserning so‘zlariga ko‘ra, loyiha yaqinda, modelyer vafotidan keyin (Armani 4-sentyabr kuni 91 yoshida jigar yetishmovchiligi oqibatida vafot etdi) boshlangan emas, balki bir necha oydan beri ishlab chiqilmoqda va bu “jahon modasining eng buyuk novatorlaridan biri hamda italyanliklikning so‘nmas ramziga hurmat bajo keltirish istagi”dan tug‘ilgan.
“Jorjio Armanining o‘limi uning nomi Italiya va butun dunyo uchun qanday ulkan ma’no va qadriyatga ega ekanini yana bir bor ko‘rsatdi”, — dedi produser.
Film Armani’ning shaxsiy va professional evolyutsiyasini yoritib beradi. Uni XX va XXI asrlarning eng nufuzli dizaynerlaridan biri sifatida keng tan olishadi. Hozircha film Armani’ning shaxsiy hayotiga to‘xtaladimi yoki faqat uning podium va qizil gilamdagi faoliyatiga e’tibor qaratadimi — noma’lum. Shuningdek, Iervolino bu loyiha yuzasidan Armani oilasidan maslahat so‘raganmi-yo‘qmi, ham ma’lum emas.
Jorjo Armani italiyalik modelyer bo‘lib, uning uslubi — nafis, yengil, ammo hashamatli kundalik kiyimlar va nozik kashtali kechki liboslar orqali XX asr oxiri va XXI asr boshidagi modaga zamonaviy minimalizm va erkinlik olib kirgan.
Shu bilan birga, omma uning minimalistik uslubini tobora ko‘proq talab qila boshladi va ko‘plab Gollivud aktrisalarini “Oskar” marosimlarida Armani liboslarida ko‘rish odatiy holga aylandi.
