Amerikalik aktrisa va BMTning Yaxshi niyatlar elchisi Anjelina Jolie Xerson shahriga xayriya tashrifi davomida kutilmagan voqea yuz berdi. OAVga ko‘ra, uning korteji tarkibidagi haydovchilardan biri Yujnoukrainsk orqali o‘tayotganda patrul tomonidan to‘xtatilib, hujjatlar bilan bog‘liq masalalar sabab maxsus markazga olib ketilgan. So‘ngra holat tezda bartaraf etib, Anjelina yo‘lida davom etgan.
Aktrisaning Xersonga tashrifi aslida gumanitar missiya doirasida bo‘lgan. Joli mahalliy tug‘ruqxona, bolalar shifoxonasi va boshqa tibbiyot muassasalarini ko‘zdan kechirib, ularning ehtiyojlari bilan tanishdi va yordam taklif etdi.
Shuningdek, Joli shaharda rasmiy tadbirda qatnashgani videolarda aniq ko‘rinadi. Xerson shahar harbiy ma’muriyati rahbari Yaroslav Shanko unga noyob yodgorlik tangasini topshirdi. U tangani “millionlab nusxalarda chiqmaydigan, o‘ziga xos esdalik” ekanini ta’kidlab, aktrisaga minnatdorchilik bildirdi.
Aktrisaning tashrifi mahalliy jamoatchilikda katta qiziqish uyg‘otdi va uning gumanitar faoliyati yana bir bor keng muhokama qilinmoqda.
