“O‘rgimchak odam: Yangi kun” filmi qo‘shimcha sahnalar bilan kinoteatrlarda qayta namoyish etilishi mumkin. Bu haqda Deadline nashri manbalariga tayanib xabar berdi.
Filmning kengaytirilgan versiyasiga yangi materiallar, jumladan, Rosario Douson ijro etgan Kler Templ obrazi ishtirokidagi sahna ham kiritilishi kutilmoqda. Aktrisa avvalroq film uchun suratga tushganini, biroq uning epizodi yakuniy versiyadan olib tashlanganini ma’lum qilgan edi.
Kler Templ obrazi Marvel muxlislariga “Daredevil”, “Jessika Jones”, “Temir musht”, “Lyuk Keyj” va “Himoyachilar” seriallaridan tanish.
Filmning qayta namoyish etilish sanasi hozircha rasman e’lon qilinmagan. Deadline ma’lumotlariga ko‘ra, Sony filmni yirik premyeralar soni kamroq bo‘lgan davrda, jumladan, premium formatlarda yana kinoteatrlarga chiqarishni rejalashtirishi mumkin.
“O‘rgimchak odam: Yangi kun” hozirda Sony tarixidagi eng kassabop film hisoblanadi. Uning jahon prokatidagi daromadi 2,495 milliard dollarga yetgan. Shu tariqa film 2021-yilda chiqqan “O‘rgimchak odam: Uyga yo‘l yo‘q”ning 1,92 milliard dollarlik natijasini ortda qoldirgan.
Filmning qayta namoyish etilishi “Qasoskorlar: Intiho”ning kinoteatrlarga qaytarilgandan keyingi muvaffaqiyatidan so‘ng muhokama qilinmoqda. Mazkur filmning qayta prokati dastlabki dam olish kunida jahon bo‘yicha 86 million dollar daromad keltirgan va uning umumiy kassasi 2,885 milliard dollarga yetgan.
Shunga qaramay, “O‘rgimchak odam: Yangi kun”ning umumiy daromadi “Qasoskorlar: Intiho” natijasidan qariyb 389,7 million dollar kam.
