Bred Pitt sun’iy intellekt o‘rtacha budjetli filmlarni suratga olishga yordam berishi mumkinligini aytdi. Aktyor bu haqda Esquire nashriga bergan intervyusida fikr bildirdi.
Pittning so‘zlariga ko‘ra, 40–90 million dollar budjetga ega filmlarni ishlab chiqarishda AI muhim vositaga aylanishi mumkin. U sun’iy intellekt atrofida ko‘plab bahslar borligini tan olgan, biroq texnologiya kinoijodkorlar uchun foydali vosita bo‘lishi mumkinligini ta’kidlagan.
Shu bilan birga, aktyor AI uning aktyorlik ijrosini to‘liq takrorlay olishiga shubha bilan qaraydi. Uning ta’kidlashicha, raqamli texnologiya aktyorning suratga olish maydonida his qiladigan tuyg‘ulari va qabul qiladigan ijodiy qarorlarini aynan qaytara olmaydi.
Pitt yaqinda AI tomonidan yaratilgan qo‘shiqni ham tinglagan. U qo‘shiqni “juda yaxshi” deb baholagan, ammo unda nimadir takrorlanib turganini va inson ovozini tinglashdagi o‘ziga xos hissiyot yetishmaganini aytgan.
