Musiqa olamidagi mashhur shaxs P. Diddi (asl ismi – Shon Kombs) ustidan jinsiy zo‘ravonlik va odam savdosi bilan bog‘liq sud jarayoni boshlanganidan bir muddat o‘tib, Jastin Biber nihoyat bu masalada o‘z fikrini bildirdi.
55 yoshli Diddi ko‘plab jirkanch jinoyatlarda ayblanmoqda. Muxlislar esa Jastin Biberning ham yoshligida musiqa sanoatiga kirib kelgan davrida, Diddi tomonidan jinsiy zo‘ravonlik qurboniga aylangan bo‘lishi mumkinligidan shubhalanishgan.
O‘tgan yili internetda ularning birga vaqt o‘tkazishayotgan eski video paydo bo‘ldi. Bu lavha ko‘pchilik tomonidan “bezovta qiluvchi” deb baholangandi. Videoda ular 48 soat davomida birga bo‘lgani tasvirlangan. Ular hatto birgalikda albom ustida ham ishlashgan.
Ammo payshanba kuni Biber rasmiy bayonot bilan chiqib, Diddi tomonidan hech qanday zo‘ravonlikka uchramaganini ma’lum qildi.
“Jastin Biber Diddining jabrlanuvchilari qatorida emas. Biroq, u tomonidan haqiqiy zarar ko‘rgan insonlar bor. Ularning boshidan o‘tgan voqealarni inkor qilish yoki e’tibor bermaslik— adolatga xiyonat bo‘ladi,” — deyiladi Biber vakili tomonidan berilgan bayonotda.
