Variety nashri xabariga ko‘ra, Vaynona Rayder “Uenzdey” serialining uchinchi mavsumida rol ijro etadi. Shu tariqa aktrisa rejissyor Tim Byorton bilan yana bir bor hamkorlikni yo‘lga qo‘ymoqda.
Hozircha tafsilotlar oshkor etilmagan. Rayderning loyihada ishtiroki rasman tasdiqlangan bo‘lsa-da, uning qaysi obrazni gavdalantirishi noma’lum.
Variety ma’lumotiga ko‘ra, uchinchi mavsum “Uenzdey” tarixida mutlaqo yangi bobni boshlab beradi. Netflix serialni 2025-yilda rasman uchinchi mavsumga uzaytirgan. Premyera sanasi hali e’lon qilinmagan, biroq suratga olish ishlari 2026-yil fevralida Irlandiyada boshlangan va rasmiy tizer ham taqdim etilgan.
“Vaynonaning bizga qo‘shilganidan juda xursandman, u bu olamga juda mos tushadi”, — deya yangilikni izohlagan Tim Burton.
Rejissyor va aktrisa muxlislari allaqachon quvonchda, chunki bu ularning ilk hamkorligi emas. Rayder Byortonning mashhur “Bitljus” filmida Lidya Dits rolini, shuningdek “Qaychiqo‘l Edvard” kartinasida Kim obrazini yaratgan. Serial bosh rol ijrochisi Jenna Ortega bilan esa u “Bitljus”ning sikvelida birga ishlagan.
Eslatib o‘tamiz, “Uenzdey”ning birinchi mavsumi 2022-yilda namoyish etilib, “Addamslar oilasi” asosida yaratilgan loyiha sifatida katta qiziqish uyg‘otgan edi. Ikkinchi mavsum 2025-yilda ekranlarga chiqqan.
