55 yoshli, “Apokalipto” va “Meksikalik” filmlari bilan tanilgan aktyor Xerardo Tarasena vafot etdi, uning o‘lim sababi hozircha ma’lum qilinmagan.
Meksika Aktyorlar Milliy Assotsiatsiyasi ushbu qayg‘uli xabarni tasdiqlab, marhumning oila a’zolari, do‘stlari va butun ijodiy jamoatchilikka hamdardlik bildirdi. “Uning ishlari va unutilmas chehrasi milliy kinematografiyamiz xotirasida abadiy qoladi”, — deyiladi Meksika Kino Akademiyasi bayonotida.
Xerardo Tarasena 1970-yil 27-mart kuni Mexiko shahrida tug‘ilgan. U xalqaro miqyosda 2006-yilda Mel Gibson suratga olgan “Apokalipto” filmi orqali tanildi. Unda u Midl Ay ismli indeys obrazini yaratgan. Bungacha aktyor 2001-yilda Bred Pitt va Julia Roberts ishtirokidagi “Meksikalik” filmida rol o‘ynagan.
2007-yilda u “Skripka” filmidagi ikkinchi darajali eng yaxshi erkak roli uchun milliy “Ariel” mukofotiga sazovor bo‘lgan. Uning boshqa mashhur ishlari qatoriga “Narcos”, “Janub malikasi” seriallari, shuningdek “G‘azab”, “Osmon hukmdori” va “Ozodlik ovozi” filmlari kiradi.
Xerardo Tarasena faoliyatini teatr va raqs festivallaridagi chiqishlardan boshlagan. U 2001-yilda kinoda ilk bor debyut qilgan. Uning ijod yo‘li Gollivud loyihalari bilan bir qatorda Meksika milliy kinosiga qo‘shgan muhim hissasi bilan ham ajralib turadi. Shu bois u tanqidchilar e’tirofi va tomoshabinlar mehrini qozongan.
