Mashhur amerikalik aktrisa va insonparvarlik faoliyati bilan tanilgan Anjelina Joli Misrning G‘azo sektori bilan chegaradosh hududiga tashrif buyurdi. U insonparvarlik yordami yetkazilishida muhim ahamiyatga ega bo‘lgan Rafah chegara-o‘tkazish punktida bo‘lib, mintaqadagi og‘ir vaziyat bilan bevosita tanishdi.
Safar davomida Anjelina Joli Misr Qizil Yarim Oy jamiyati volontyorlari, gumanitar tashkilotlar vakillari hamda G‘azoga yetkazilishi kutilayotgan oziq-ovqat, dori-darmon va birlamchi ehtiyoj buyumlari ortilgan yordam karvonlari haydovchilari bilan uchrashdi. Aktrisa gumanitar yuklarning saqlanish sharoitlarini ko‘zdan kechirib, yordamning ko‘pincha uzoq vaqt davomida chegaradan o‘ta olmayotgani bilan tanishdi.
Shuningdek, Joli Misrning Al-Arish shahridagi shifoxonalarga tashrif buyurib, Rafah orqali evakuatsiya qilingan G‘azo aholisi bilan suhbatlashdi. U jarohatlanganlar, ularning oila a’zolari va tibbiyot xodimlari bilan muloqot qilib, ayniqsa ayollar va bolalarning ahvoliga alohida e’tibor qaratdi.
Tashrif chog‘ida Anjelina Joli jahon hamjamiyatiga murojaat qilib, G‘azodagi insonparvarlik inqirozi nihoyatda og‘ir ekanini ta’kidladi. U xalqaro tashkilotlar va hukumatlarni yordam yetkazishni tezlashtirishga chaqirib, oziq-ovqat, dori-darmon va yoqilg‘i ta’minotidagi kechikishlar tinch aholining hayotiga bevosita tahdid solayotganini bildirdi. Uning so‘zlariga ko‘ra, siyosiy vaziyatdan qat’i nazar, tinch aholini himoya qilish va gumanitar yordamga erkin yo‘l ochish ustuvor vazifa bo‘lishi lozim.
Aktrisa, shuningdek, Misrning jabrlanganlarni qabul qilish va insonparvarlik tashabbuslaridagi rolini yuqori baholab, Rafah chegara punktining barqaror va xavfsiz faoliyati muhimligini qayd etdi.
Ma’lumot o‘rnida aytish joizki, Anjelina Joli yillar davomida insonparvarlik missiyalarida faol ishtirok etib keladi va avvalroq BMTning Qochqinlar bo‘yicha Oliy komissari boshqarmasining maxsus elchisi sifatida ham faoliyat yuritgan. Uning G‘azo chegarasiga tashrifi mintaqadagi gumanitar inqirozga yana bir bor jahon e’tiborini qaratdi va zudlik bilan xalqaro choralar ko‘rish zarurligini eslatdi.
