“Juda g‘alati ishlar” seriali yakuniga yetib borar ekan va Netflix’ning mashhur seriali finali Yangi yil arafasida namoyish etilishi kutilar ekan, uning so‘nggi to‘qqiz yil davomida madaniyatga ko‘rsatgan ta’sirini inkor etib bo‘lmaydi. Variety nashrining xabar berishicha, so‘nggi mavsum rekord darajadagi tomoshalarni qayd etdi.
Endilikda, beshinchi mavsumning birinchi qismi chiqqaniga bir oydan kam vaqt o‘tib va ikkinchi qismi chiqishiga sanoqli kunlar qolgan bir paytda, Netflix “Juda g‘alati ishlar” serialining umumiy tomoshalari soni 1,2 milliarddan oshganini ma’lum qildi.
Bu ko‘rsatkich serialni Netflix tarixidagi barcha seriallardan — hatto “Uensdey” va “Kalmar o‘yini”dan ham — yuqori o‘ringa olib chiqdi. 2022-yilda chiqqan to‘rtinchi mavsum esa Netflix talqiniga ko‘ra, barcha davrlarning eng mashhur ingliz tilidagi seriallari ro‘yxatida ikkinchi o‘rinda qolmoqda. Olti yildan ortiq vaqt avval chiqqan uchinchi mavsum esa faqat yaqinda ushbu reytingni tark etdi.
Beshinchi mavsumning ilk qismi atigi 25 kun ichida 102,6 million tomoshani yig‘di. Shubhasizki, kelasi oyda beshinchi mavsum barcha davrlarning eng mashhur teleseriallari hit-paradiga kiradi. Bundan tashqari, Netflix ma’lumotlariga ko‘ra, har bir mavsumning yakuniy qismlari chiqqanidan so‘ng reytinglarda hisob-kitoblar 91 kun davom etadi. Bu degani, beshinchi mavsum Yangi yil finalidan keyin ham yana uch oy davomida tomosha yig‘adi. Mavsumning birinchi o‘ringa chiqish ehtimoli juda yuqori.
