“Hayvonlar shahri 2” (Zootopia 2) multfilmining muvaffaqiyatiga deyarli hech kim shubha qilmayapti, biroq baribir uning kassadagi daromadlari yuzasidan bahslar davom etmoqda. Avvalroq ekspertlar besh kun ichidagi daromad 125 million dollar bo‘lishi mumkinligini aytgan bo‘lsa, endi esa multfilmning butun dunyo bo‘yicha boshlang‘ich daromadi 500 million dollardan oshishi haqida gapirilmoqda.
BoxOfficeMojo ma’lumotlariga ko‘ra, faqatgina Xitoyning o‘zida multfilm taxminan 200 million dollar daromad qilishi mumkin, AQShda esa besh kunlik prokat davomida 125–150 million dollar atrofida tushum kutilyapti. Yevropa Ittifoqi mamlakatlari bo‘yicha taxminlar keltirilmagan, biroq baribir yangi “Hayvonlar shahri”ga juda kuchli start bashorat qilinmoqda — ehtimol, hatto 2025-yilning eng yaxshi boshlang‘ich kassasi bo‘lishi ham mumkin.
Joriy yilda eng yuqori jahon kassasini quyidagi filmlar ko‘rsatgan:
- “Lilo va Stitch” remeyki — 341 million dollar,
- “Minecraft: Kino” — 313 million dollar.
“Hayvonlar shahri 2” xalqaro prokatga 26-noyabr kuni chiqadi.
