K-pop — dunyo bo‘yicha trend, ammo so‘nggi ko‘rsatkichlar buning teskarisini ko‘rsatmoqda. Koreya musiqasi o‘z yurtida unutilib borayotgandek — buning sababi nimada? Keling, bilib olaylik.
Billboard chartlaridan tortib AQSh, Yevropa va Janubi-Sharqiy Osiyodagi anshlagli turlargacha bo‘lgan ulkan muvaffaqiyatiga qaramay, K-popning Janubiy Koreyadagi mavqei asta-sekin zaiflashmoqda. Mutaxassislar tobora ko‘proq bu janrning global e’tirofi va mahalliy auditoriya qiziqishining pasayishi o‘rtasida chuqurlashayotgan tafovut haqida gapirmoqda.
Asosiy sabab sifatida 2025-yilning birinchi yarmida yangi qizlar guruhlari orasida yorqin debyutlarning yo‘qligi ko‘rsatib o‘tilmoqda. Avvallari aynan ular fan-baza va bozor o‘sishiga turtki bo‘lgan edi, ammo bu yil yangi guruhlar avvalgi darajadagi hayajonni uyg‘ota olmadi.
Circle Chart’ning yarim yillik hisobotiga ko‘ra, yetakchi 400 trekning umumiy raqamli iste’moli o‘tgan yilga nisbatan 6,4% ga, 2019-yildagi eng yuqori ko‘rsatkichlarga nisbatan esa 49,7% ga kamaygan. Jismoniy albom sotuvlari ham 9% ga tushib, 2024-yildagi 46,7 million nusxaga qarshi 42,4 million nusxani tashkil etdi.
Millionlik chegara oshgan albomlar soni to‘qqiztadan yettitaga kamaydi. Hech bir reliz 3 million sotuv natijasiga yetmadi — bunday ko‘rsatkichni o‘tgan yili SEVENTEEN guruhi qayd etgan edi. Ushbu ma’lumotlar faol muxlislar soni va ularning xarid qilish faolligi qisqarayotganidan dalolat beradi.
