CNN telekanali xabar berishicha, oʻzining klassitsizm va romantizm janridagi musiqalari bilan nom qoldirgan nemis bastakori Lyudvig van Betxoven haqidagi yangi tadqiqotlar u nima uchun 20 yoshida kar boʻlib qolgani va oʻlimiga sabab boʻlgan omillarga aniqlik kiritdi.
Qayd etilishicha, bastakor eshitish qobiliyatini yoʻqotishdan tashqari, umri davomida oshqozon-ichak kasalliklaridan aziyat chekkan, ikki marta sariq kasal xurujini boshdan kechirgan va ogʻir jigar xastaligiga chalingan.
10 yillik tadqiqotlardan so‘ng, joriy yilning 6-may kuni “Clinical Chemistry” jurnalida chop etilgan yangi hisobotga koʻra, ijodkorning soch oʻrimlari tarkibida qoʻrgʻoshinning yuqori konsentratsiyasidan tashqari, mishyak va simob aniqlangan.
Tadqiqot mualliflari qoʻrgʻoshin bilan zaharlanish Betxovenning oʻlimi yoki karligi uchun yagona sabab boʻlolmasligini taʼkidlagan. Ammo zaharlanish uning kar boʻlib qolishi, mushaklar falajligi va buyrak yetishmovchiligini boshdan kechirishiga sabab boʻlgan.
