Amerikalik mashhur qo‘shiqchi va aktrisa Selena Gomes hamda taniqli prodyuser Benni Blanko o‘zaro munosabatlarini rasman e’lon qilganidan so‘ng, muxlislar ularning to‘y sanasini katta qiziqish bilan kutmoqda. Biroq, yaqinda Benni bu borada o‘z fikrlari bilan o‘rtoqlashdi.
“Therapuss” podkastida ishtirok etgan Blanko shunday dedi:
“Rostini aytsam, hozircha biroz dam olgim keladi. Men juda ko‘p ishladim, bir oz bo‘sh vaqtga ehtiyojim bor. Yotib, bugun qaysi kunligini unutib yashagim keladi. Selenaning yonida esa kun bo’yi hech narsa qilmay yotishning o’zi lazzat. Biz birga ovqatlanamiz, quchoqlashamiz va atrofda faqat tinchlik va oziq-ovqat bo‘lsa, menga shu yetarli.”
To‘y rejasi haqida savolga javoban u shunday dedi:
“Biz hali bu haqda jiddiy o‘ylab ham ko‘rganimiz yo‘q. Avvaliga biz albomimiz uchun kliplar suratga oldik, so‘ngra bayramlar boshlandi, keyin esa promoga sho‘ng‘idik. Ikkimiz ham bandmiz, ilgari bajara olmagan loyihalarni amalga oshiryapmiz. Ammo, bu yozda nihoyat o‘tirib, to‘y haqida jiddiy gaplashamiz deb o‘ylayman.”
Selena Gomes va Benni Blankoning to‘y sanasi hali aniqlanmagan bo‘lsa-da, ular orasidagi iliq munosabat va o‘zaro qo‘llab-quvvatlash barchaga ayon.
Ma’lumot o‘rnida, Selena va Benni o‘rtasidagi munosabatlar 2023-yil oxirida oshkor bo‘lgan. Ular ilk marta 2021-yilda “I Can’t Get Enough” qo‘shig‘i ustida ishlaganida tanishgan. 2024-yil 12-dekabr kuni Selena Gomes o‘zining ijtimoiy tarmoqlari orqali ular unashtirilganini e’lon qilgan. 2025-yil boshida juftlik “I Said I Love You First” nomli birinchi musiqiy albomini taqdim etdi.
