Har yili o‘tkaziladigan va moda olamining eng ko‘p muhokama qilinadigan kechasi — “Met Gala–2026” mavzusi nihoyat e’lon qilindi. Bu haqda Vogue jurnali xabar berdi.
“Met Gala–2026” uchun dress-kod — “Moda — bu san’at”. Bu shuni anglatadiki, mashhurlar va dizaynerlar shunchaki libos namoyish etish bilan cheklanmay, modani san’at shakli sifatida talqin etishlari kerak bo‘ladi. Bunday mavzu keng talqin erkinligini beradi: tarixiy san’at asarlaridan ilhomlangan obrazlardan tortib, zamonaviy syurrealistik va konseptual liboslarga qadar turli ko‘rinishlarni kutish mumkin.
An’anaviy tarzda bal Nyu-Yorkdagi Metropoliten muzeyi qoshidagi Kostyum instituti ko‘rgazmasi bilan bog‘liq bo‘ladi. Bu yilgi ekspozitsiya “Costume Art” deb nomlanib, modani rassomlik, haykaltaroshlik va boshqa san’at turlari qatorida ko‘rib chiqadi. Zero, kiyim inson tanasi tarixi va madaniy ma’nolarini ming yillar davomida aks ettirib keladi.
“Met Gala–2026” 4-may kuni bo‘lib o‘tadi. Taklif etilgan mehmonlarning to‘liq rasmiy ro‘yxati hali e’lon qilinmagan. Biroq an’anaviy hamraislari allaqachon ma’lum: Beyonse, Nikol Kidman, Venus Uilyams hamda Anna Vintur.
Tashkiliy qo‘mita tarkibida esa Zoi Kravis, Sabrina Karpenter, Doja Ket, Aleks Konsani, Elizabet Debiski, Xlo Malle, Teyana Teylor va boshqa ko‘plab uslub ikonlari bor.
Eslatib o‘tamiz, Met Gala avvalo Nyu-Yorkdagi Kostyum institutini qo‘llab-quvvatlash maqsadida o‘tkaziladigan xayriya oqshomidir. Har yili aynan shu tadbir muzeyning yangi moda ko‘rgazmasiga rasman start beradi. Birinchi Met Gala 1948-yilda tashkil etilgan.
