Netflix “Emili Parijda” serialining beshinchi mavsumi premyera sanasini ma’lum qildi va yangi epizodlarda nimalar bo‘lishi haqida batafsilroq ma’lumot berdi.
Moda ixlosmandi va marketolog Emili Kuperning Yevropa bo‘ylab sayohati Netflix’da 2025-yil 18-dekabr kuni davom etadi. Deadline xabariga ko‘ra, 10 qismdan iborat bo‘lgan mavsum birdaniga to‘liq namoyish etiladi (oldingi mavsum esa ikki qismga bo‘lingan edi). Bu safar Emili Venetsiyaga ham tashrif buyuradi.
Syujetga ko‘ra, Lili Kollinz ijro etgan Emili Kuper endi Agence Grateau Rome agentligini boshqaradi va u yangi uyga moslashayotib, ham ishida, ham shaxsiy hayotida qiyinchiliklarga duch keladi. Hammasi joy-joyiga tushayotgandek bo‘lganda esa, biror falokat yuz berib, bu Emili uchun ham yurak og‘rig‘i, ham ishdagi muvaffaqiyatsizliklarga sabab bo‘ladi.
Barqarorlik izlab, Emili fransuzcha hayot tarziga murojaat qiladi, biroq katta bir sir uning munosabatlariga tahdid sola boshlaydi. Turli nizolarni boshdan kechirar ekan, u yaqinlari bilan aloqalarini mustahkamlaydi va yangi sinovlarga tayyor bo‘lishni o‘rganadi.
Suratga olish jarayonidagi kadrlar shuni ko‘rsatadiki, Lili Kollinz endi qisqa kare soch turmagi bilan. Emili uchun yangi imidji ko‘plab muhokamalarga sabab bo‘lmoqda.
