Demi Mur samimiy tarzda Bryus Uillisning sog‘lig‘i yomonlashayotganini kuzatish unga qanchalik og‘ir tushayotganini aytib berdi. Aktrisa yangi intervyusida butun oila boshidan kechirayotgan hissiyotlari bilan o‘rtoqlashdi.
Sobiq turmush o‘rtoqliklariga qaramay, ular iliq munosabatni saqlab qolishgan. Demi Murning so‘zlariga ko‘ra, demensiyaga qarshi kurash katta sabr, tushunish va birlikni talab qiladi. U shuningdek, bu kasallik Bryus bilan bo‘lgan qizlari — Rumer, Skaut va Tallulaga ham og‘ir sinov bo‘lganini aytdi.
Bundan tashqari, Demi Mur aktyorning hozirgi rafiqasi — Emma Heming-Uillisning aql bovar qilmas matonatini alohida ta’kidladi. Aktrisa oilaning birligi barcha qiyinchiliklarni yengishga yordam berayotganini qo‘shimcha qildi. Biroq, uning so‘zlariga ko‘ra, insonning o‘zgarib, qiynalayotganini ko‘rish juda og‘ir:
“Bu qiyin. Oldin juda quvvatli, kuchli va maqsadga intiluvchan bo‘lgan odamning boshqa bir qismga aylanishini ko‘rish og‘ir. Lekin bilasizmi, mening nuqtai nazarimdan, ularni qanday bo‘lsa, shunday qabul qilish juda muhim. Siz ularning oldingi holatiga qaytishini yoki o‘zingiz xohlagan odamga aylanishini kutmasligingiz kerak. Shunday qilganingizda, men ulkan mehr, yumshoqlik va sevgi his qilaman”, — dedi Demi Mur.
Eslatib o‘tamiz, 2022-yil mart oyida Bryus Uillisning oilasi aktyor barcha suratga olish ishlarini to‘xtatishga majbur bo‘lganini ma’lum qilgan edi. O‘shanda uning nutq buzilishi aniqlangani, buning natijasida til qobiliyatlari butunlay zararlangani aytilgandi. 2023-yil fevralida esa aktyorning rafiqasi unga lobno-visocha demensiya tashxisi qo‘yilganini bildirdi.
Bunga qadar suratga olingan “Emma va Bryus Uillis: Kutilmagan sayohat” hujjatli filmida aktyorning rafiqasi ularning alohida yashayotganini tan olgach, unga ko‘plab tanqidlar yog‘dirildi. Emma esa sukut saqlamay, kuzatuvchilarga javob qaytardi.
