Xonanda Maksim Kaliningraddagi konserti yana bekor qilinganini ma’lum qildi. Dastlab 2-avgustga rejalashtirilgan chiqish 28-sentyabrga ko‘chirilgan edi, biroq belgilangan sanada ham konsert bo‘lib o‘tmadi.
Xonandaning so‘zlariga ko‘ra, tadbir tashkilotchilari konsert o‘tkazish uchun zarur shartlarni ta’minlamagan. Jumladan, sahna xonanda jamoasi talablariga muvofiq tayyorlanmagan, texnik va maishiy rayderlar bajarilmagan. Shuningdek, xonanda va uning jamoasi uchun chiptalar olinmagan hamda turar joy band qilinmagan.
“Bunday sharoitda konsert o‘tkazishning imkoni yo‘q. Uchrashuvimiz yana amalga oshmagani meni juda xafa qildi. Bilaman, ko‘pchiligingiz bu kunni kutgandingiz”, — dedi xonanda.
Maksim konsertning o‘tkazilmasligiga uning yoki jamoasining tomonidan hech qanday to‘siq bo‘lmaganini ta’kidladi. Xonanda Kaliningradga borish niyatida ekanini va zarur shartlarni ta’minlay oladigan yangi tashkilotchilarni izlayotganini bildirdi.
