Dunyo pop-musiqasining yulduzi, barbadoslik qo‘shiqchi Rihanna va uning turmush o‘rtog‘i, mashhur repper A$AP Rocky uchinchi farzandini qarshi oldi. Bu haqda san’atkor o‘zining ijtimoiy tarmoqlarida muxlislari bilan bo‘lishdi.
Rihanna ilk bor qizalog‘ining suratini e’lon qildi. Birinchi kadrlarda qo‘shiqchi chaqaloqni bag‘riga bosgan holda tasvirlangan bo‘lsa, yana bir suratda pushti rangdagi kichkina bokschi qo‘lqoplari aks etgan. Ushbu ramziy detal muxlislar tomonidan juda iliq kutib olindi.
Ma’lum bo‘lishicha, qizaloq 13-sentabr kuni dunyoga kelgan va unga Roki Ayrish Meyers deb ism qo‘yilgan.
Shu tariqa, Rihanna va A$AP Rocky oilasi endi uch farzandga ega:
- RZA — 3 yoshda,
- Riyot — 2 yoshda,
- hamda yangi tug‘ilgan qizalog‘i — Roki Ayrish.
Bu yangilik ijtimoiy tarmoqlarda katta shov-shuvga sabab bo‘ldi. Ayniqsa, muxlislar yulduzli oilada nihoyat qiz farzand tug‘ilgani uchun quvonchlarini yashirmadi.
Rihanna muxlislari ularni samimiy tabriklab, qizalog‘iga baxtli kelajak tilamoqda.
