Dunyoning eng nufuzli kino voqealaridan biri — 27-avgust kuni start olgan 82-Venetsiya xalqaro kinofestivali (2025) bu yil ham kino ixlosmandlari va san’at ahli uchun katta taassurotlar qoldirmoqda. Festival nafaqat yangi filmlarning taqdimoti, balki yulduzlarning jonli chiqishlari, qarsaklarga to‘la zal va moda sahnasidagi yorqin ko‘rinishlar bilan ham esda qolarli. Quyida eng yirik va unutilmas voqealarga nazar tashlaymiz.
“Chil-chil sindirish mashinasi — – rekord darajadagi qarsaklar
Festivalning eng muhim voqeasi shubhasiz Dueyn “The Rock” Jonson bosh rol ijro etgan “The Smashing Machine” filmining taqdimoti bo‘ldi. Sobiq MMA jangchisi Mark Kerr hayotidan hikoya qiluvchi bu sport dramasi 15 daqiqa davomida tik turgan holda qarsaklar bilan olqishlandi. Tomoshabinlarning samimiy qabulidan hayajonlangan Jonson ko‘z yoshlarini tiya olmadi. Bu film tanqidchilar tomonidan “Oskar” nomzodlari orasida bo‘lishi mumkinligi ta’kidlandi.
“Frankenstein” — Gilyermo del Toro’ning yangi asari
Mashhur rejissyor Gilyermo del Toroning “Frankenstein” filmi ham festivalda katta e’tibor qozondi. Yosh aktyor Jaykob Elordi o‘zining dramatik roli uchun tomoshabinlar olqishiga sazovor bo‘ldi. Filmning maxsus effektlari, grim va chuqur dramatik syujeti tanqidchilar tomonidan iliq kutib olindi.
Umrboqiy mukofotlar — Kim Novak va Verner Hersog
Festival doirasida kino olamiga katta hissa qo‘shgan ikki buyuk shaxs — aktrisa Kim Novak va rejissyor Verner Hersog “Golden Lion for Lifetime Achievement” mukofoti bilan taqdirlandi. Bu mukofotlar ularning san’atga qo‘shgan ulkan hissasiga bo‘lgan hurmat ramzi sifatida tantanali marosimda topshirildi.
Frensis Ford Koppola — katta qaytish
Yurak operatsiyasidan keyin sahnaga chiqqan 86 yoshli buyuk rejissyor Frensis Ford Koppola tomoshabinlar tomonidan katta qiziqish bilan kutib olindi. U nafaqat sog‘lig‘i tiklanib, o‘z muxlislarini xursand qildi, balki festivalning tarixiy lahzalaridan birini yaratdi.
Bu yil qizil gilamda Juliya Roberts Vercace libosida soddaligi, nafisligi va, albatta, uning allaqachon obrazining bir qismiga aylangan tabassumi bilan yana bir bor asl yulduz oddiylikda ham porlashi mumkinligini eslatdi. Keyt Blanshett barqaror modani targ‘ib qilib, qayta kiyilgan Armani Prive libosida ko‘rinish berdi. Lantimos, Emma Stounlarning tanlagan Louis Vuitton liboslari brendga qanchalik sodiqligini ko‘rsatdi. Tilda Suinton Chanel kreasyonida avangard nafislikni namoyish etdi.
2025-yilgi Venetsiya kinofestivali kino olamida yana bir tarixiy sahifa ochmoqda. “The Smashing Machine” va “Frankenstein” singari filmlar kelgusi “Oskar” poygasining eng asosiy nomzodlari sifatida tilga olinmoqda. Festival esa san’at, moda va insoniy his-tuyg‘ular uyg‘unlashgan noyob maydon bo‘lib qolmoqda.
Eslatib o‘tamiz 82-Venetsiya xalqaro kinofestivali 6-sentabrgacha Italiyadagi Venetsiya shahrida bo‘lib o‘tdi.
