“Uenzdey” seriali yaratuvchilari Addamslar oilasi haqida yangi animatsion film ustida ishlashyapti. Bu mashhur serial bilan hech qanday bog‘liqligi bo‘lmagan butunlay yangi hikoya bo‘ladi.
Serial ustida ishlagan Alfred Gof va Maylz Millar Amazon MGM Studios uchun yangi animatsion film yaratishyapti.
Gof “Crew Call”ga bergan intervyusida shunday dedi:
“Biz animatsion franshizani qayta ishga tushiryapmiz. Filmning avvalgi ikki qismga ham, serialga ham aloqasi bo‘lmaydi. Bu Addamslar oilasi haqida butunlay yangi to‘liq metrajli hikoya bo‘ladi. Hozircha ko‘p narsa aytolmaymiz, chunki loyiha juda yangi bosqichda.”
Shu bois hozircha filmning chiqish sanasi haqida gapirishga ham erta, ammo umid qilamizki, kutish juda uzoq bo‘lmaydi. Bundan tashqari, bu ijodiy duet Uenzdey obrazining jozibasi nimada ekanini ham aytib o‘tdi.
Gofning so‘zlariga ko‘ra – “Bosh kalit — hazil yozishga urinmaslik, balki uning dunyoqarashini yetkazishdir. Agar hazilni majburan qo‘shishga harakat qilsang — o‘sha jumla oxirida kesib tashlanadi.”
