Turk aktyori Burak O‘zchivit “Usmon: Asos soluvchi” serialining yettinchi — yakuniy mavsumida suratga tushmaydi. Bu haqida jurnalist Birsen Altuntash xabar berdi.
Serialning yangi mavsumi kuzda efirga uzatilishi kerak edi. Biroq Burak O‘zchivit bilan serial prodyuseri o‘rtasida mojaro yuzaga kelgani aytilmoqda. Mojarodan so‘ng ular ijtimoiy tarmoqlarda bir-birlarini kuzatishni to‘xtatgan va hamkorlikni bekor qilishgan.
Ma’lumotlarga ko‘ra, Usmon G‘ozi obrazini yaratgan aktyor har bir qism uchun 4 million turk lirasi maosh talab qilgan. Ammo serial ijodkorlari bu talabni rad etishgan va natijada aktyor loyihani tark etgan.
Eslatib o‘tamiz, “Usmon: Asos soluvchi” seriali Usmoniylar imperiyasiga asos solgan Usmon I G‘ozi hayotini hikoya qiladi. Yettinchi mavsumda bosh rol kimga nasib etishi esa hozircha noma’lum.
