Xueba 01 (xitoy tilidan tarjimada — “a’lochi”) Shanxay teatr akademiyasining “Dramaturgiya va kino” bo‘yicha doktorantura dasturi talabalar safiga qo‘shildi. Bu haqda South China Morning Post xabar berdi.
Xueba 01 — balandligi taxminan 175 sm, vazni esa 30 kilogrammdan oshmaydigan robot bo‘lib, odamlar bilan muloqot qila oladi va mimikani namoyon eta oladi. Uni Shanxay fan va texnologiya universiteti hamda DroidUp Robotics kompaniyasi yaratgan.
Ma’lum bo‘lishicha, robot to‘rt yil davomida teatr san’ati, aktyorlik mahorati va ssenariy yozishni o‘rganadi. Uning ilmiy rahbari professor Yan Tsingtsin hisoblanadi.
“Xueba 01 sinfdoshlari bilan muloqot qilganda, bu sovuq mashinaning inson bilan uchrashuvi emas, balki turli mavjudotlar o‘rtasidagi estetik almashinuvdir”, — deya fikr bildirdi professor.
