Reper Lil Pump tug‘ilgan kunidan uch kun oldin jiddiy yo‘l-transport hodisasiga uchradi. Yomg‘ir va sirpanchiq yo‘l tufayli uning mashinasi ag‘darilib, yo‘l chetiga chiqib ketgan. Xonanda bo‘lib o‘tgan voqeani o‘zining ijtimoiy tarmoqlarida bo‘lishdi.
24 yoshli Lil Pump avtomobil oynasini o‘zi sindirib, mashinadan chiqishga muvaffaq bo‘lgan. U obunachilariga yomg‘irli havoda mashina haydash xavfli ekanini eslatib o‘tdi.
Shuningdek, reper tug‘ilgan kunini cherkovda o‘tkazishni, Xudoga hayotidagi barcha ne’matlar uchun minnatdorlik bildirishini aytdi:
“Do‘stlar, men bir necha kun oldin hayotimdan ayrilishim mumkin edi. Yomg‘irda mashina haydamang. Sog‘liq — bu boylik. Chiqish uchun oynani sindirishimga to‘g‘ri keldi. Agar buni qilmaganimda o‘lgan bo‘lardim. Tug‘ilgan kunimni Xudoga minnatdorlik bildirish uchun cherkovda o‘tkazaman.”
Bu reperning bunday voqeaga ilk marotaba duch kelishi emas. Avvalroq Kaliforniyalik bir fuqaro 2006-yilgi Bentley ishtirokidagi jiddiy YTH yuzasidan Lil Pump, uning menejeri va yana bir necha kishiga qarshi sudga murojaat qilgan edi.
Eslatib o‘tamiz, yaqinda Lil Pump Rossiyada bo‘lib, Moskvadagi klublardan birida konsert berdi. U o‘zining ijtimoiy tarmoqlarida ushbu chiqishidan video ham joylashtirgan. Shuningdek, mish-mishlarga ko‘ra, reper konsertdan so‘ng o‘zini Filipp Kirkorovning shogirdi deb ataydigan qo‘shiqchi Margo bilan birgalikda qo‘shiq yozgan.
