Mashhur aktyor Leonardo Di Kaprio Netflix uchun suratga olinadigan “Kapitan Planeta” serialining prodyuseri sifatida ishtirok etadi, deb xabar beradi Deadline nashri.
Serial ustida Leonardo Di Kaprio tomonidan tashkil etilgan “Appian Way” prodakshn kompaniyasi ishlaydi. Shuningdek, Greg Berlantining Berlanti Productions kompaniyasi va Warner Bros. Television ham loyihada ishtirok etadi. Ssenariy muallifi sifatida Tara Ernandes ish olib boradi — u “Buyuk portlash nazariyasi” va “Yosh Sheldon” kabi mashhur seriallar ustida 10 yildan ortiq ishlagan.
Serial asosini 1990-yilda TBS telekanalida namoyish etilgan “Kapitan Planeta va qutqaruvchilar jamoasi” multseriali tashkil etadi. Unda besh nafar o‘smir ekologik muammolar bilan kurashib, Kapitan Planetaning yordami bilan sayyorani halokatdan saqlab qolishga harakat qilishadi.
Ekologik muammolar “Appian Way” tomonidan tayyorlangan hujjatli filmlarda asosiy mavzu sifatida ko‘tarilgan. Kompaniya ishlab chiqargan “Yo‘lbarslar yo‘li”, “Biz qo‘riqchilarmiz”, “Virunga”, “Biz yashilga aylanyapmiz”, “Fin”, “Eng yolg‘iz kit” va “Muzli olov” kabi filmlar hatto Emmi mukofotiga ham sazovor bo‘lgan. Shuningdek, ularning “Ozi: o‘rmon ovozi” nomli bolalar uchun mo‘ljallangan animatsion seriali ham mavjud.
Eslatib o‘tamiz, Leonardo Di Kaprio yana bir loyihada ishtirok etishni rejalashtirmoqda. Paramount kinokompaniyasi afsonaviy kaskadyor hayoti haqida “Evel Knivel gastrollarda” nomli biografik film suratga olmoqchi. Di Kaprio ushbu filmda bosh rolga da’vogar sifatida tilga olinmoqda.
