“Hayvonlar shahri 2” kinoteatrlardagi namoyishining atigi 17 kuni ichida dunyo bo‘ylab 1 milliard dollar kassaviy daromad to‘pladi. Shu tariqa u PG reytingiga ega filmlar orasida ushbu moliyaviy marraga eng tez yetgan filmga aylandi.
Mazkur animatsion film joriy yilda 1 milliard dollardan ortiq daromad keltirgan uchinchi loyiha bo‘ldi. Undan oldin Disney’ning “Lilo va Stich” filmi (1,03 mlrd dollar) hamda Xitoy animatsion xiti “Neeja 2” (1,9 mlrd dollar) bu natijaga erishgan. “Neeja 2” hozirda 2025-yilning eng kassabop filmi hisoblanadi. Kino tarixida esa atigi 13 ta animatsion film dunyo bo‘yicha 1 milliard dollardan ortiq daromadga ega bo‘lgan bo‘lib, ularning 10 tasi Disney tomonidan chiqarilgan.
Walt Disney Animation Studios’ning kreativ direktori Jared Bush film muvaffaqiyati haqida shunday dedi: “Disney Animation jamoasining barcha xodimlari tom ma’noda yuragini, jonini va butun ishtiyoqini ushbu filmga bag‘ishladi. Biz tomoshabinlarga quvonch, tasavvur va chuqur mazmunga boy hikoyani taqdim etishni xohladik”.
