Turkiyaning taniqli aktrisasi, “So‘yla, Qora dengiz” seriali orqali keng ommaga tanilgan Irem Xelvajio‘g‘lu yana shaxsiy hayoti bilan omma e’tiboriga tushdi. 2024-yilning oktabrida u mashhur tadbirkor Ural Kaspar bilan turmush qurgani haqida ma’lum qilgan edi. Aktrisa va Uralning munosabatlari yillar davomida bir necha bor uzilib-ulanib turgan, hatto to‘yga oz vaqt qolganda ham ular yana birga bo‘lmasligi haqidagi mish-mishlar tarqalgan edi. Shu sababdan ularning nikohi muxlislar uchun kutilmagan voqea bo‘lgan.
Biroq oradan ko‘p o‘tmay, turk matbuoti Irem Xelvajio‘g‘lu va Ural Kaspar ajrashishga qaror qilgani haqida xabar bera boshladi. Bir necha hafta oldin aktrisa Sora ismli qizaloqni dunyoga keltirgan edi. Ural Kaspar farzandining tug‘ilganidan juda mamnun ekanini aytgan, ijtimoiy tarmoqlarda rafiqasiga samimiy minnatdorlik bildirib, xursandchiligini yashirmagan. Oilaning birgalikdagi suratlari ham muxlislar orasida ularda hammasi yaxshi degan tasavvur uyg‘otgandi.
Ammo Aksam nashrining ma’lumotiga ko‘ra, juftlik o‘zaro kelishgan holda ajrashishga qaror qilgan. Bu qarorga nima sabab bo‘lgani hozircha ochiqlanmadi. Na Iremning vakillari, na uning yaqinlari, na Ural Kaspar voqea yuzasidan biror izoh bergan.
Irem Xelvajio‘g‘lu ilgari bergan intervyularida oila qurish va ona bo‘lish uning eng katta orzularidan biri ekanini ta’kidlagan. U hatto to‘yning o‘tkazilishi ham Uralning taklifi bilan amalga oshganini aytgandi. Shu bois ajrashish haqidagi xabar aktrisaning ko‘plab muxlislarini hayratga soldi.
Yaqinda esa juftlik qizi bilan birga avtohalokatga uchragani ham xabar qilingandi. Ular ketayotgan mashinaga boshqaruvni yo‘qotgan mototsikl kelib urilgan. Oila a’zolari darhol kasalxonaga olib borilgan, Iremning jarohatlari uchun bir necha chok qo‘yilgan. Biroq jarohatlar yengil bo‘lgani sababli shifokorlar kuzatuvdan so‘ng ularni uyiga javob bergan.
Hozircha ajrashish jarayonining qachon boshlanishi va Irem hamda Uralning kelgusi rejalari haqida ma’lumot yo‘q.
