Bu xastalik allaqachon aktyorning otasida aniqlangan, Hemsvortning o‘zida esa noyob genetik mutatsiya topilgan.
Avstraliyalik aktyor Kris Hemsvort oilasining kasallik bilan bog‘liq shaxsiy tarixini ochiqladi. Uch yil avval Marvel yulduzi o‘zida APOE4 genining ikki nusxasi borligini bilib oldi. Bu esa Altsgeymer kasalligiga chalinish xavfini 8–10 barobar oshiradi.
Avvaliga bu xabar Krisni larzaga solgan, biroq u xavotirli fikrlarni chetga surishga harakat qilgan. Uni otasi — Kreyg Hemsvort qo‘llab-quvvatlab, shunday degan:
“Sening oldingda hali juda ko‘p vaqt bor. Biz bu kasallikning oldini olish uchun nima qilish mumkinligini birga aniqlaymiz.”
Biroq 2–3 yildan so‘ng fojeali burilish yuz berdi, deya Kris Jay Shetti bilan bo‘lgan intervyusida aytib o‘tdi. Aktyorning onasi erida tashvishli alomatlarni — unutuvchanlik va kayfiyat o‘zgarishlarini sezgan. Tekshiruvlardan so‘ng Kreyg Hemsvortga Altsgeymer kasalligi tashxisi qo‘yildi.
Ma’lum bo‘lishicha, Krisning ikkala ota-onasi ham APOE4 genining ikki nusxasiga ega bo‘lgan. Bu juda noyob mutatsiya bo‘lib, Yer aholisining atigi 1 foizida uchraydi. Ikki shunday odamning uchrashib, turmush qurib, farzandli bo‘lishi — hayratlanarli tasodif. Natijada bu mutatsiya Krisning aka-ukalari — Lyuk va Liam Hemsvortga ham o‘tgan.
“Bu haqiqat bilan yuzma-yuz kelish bo‘ldi, ayniqsa otam uchun. Biz bu mavzuni doim keyinga surib kelgandik. Birdan u ko‘z o‘ngimizda paydo bo‘ldi. Bu juda kutilmagan edi”, — deydi Kris Hemsvort.
Otasi bilan ko‘proq vaqt o‘tkazish va uni qo‘llab-quvvatlash uchun Kris u bilan Avstraliya bo‘ylab mototsikl sayohatiga chiqdi. Shu bilan birga ular “Xotira sari sayohat” nomli hujjatli filmni suratga olishdi.
Krisning aytishicha, bu sayohat otasi uchun ham o‘ziga xos terapiya bo‘lgan:
“Bu tanish joylar, musiqa va suratlar orqali eski xotiralarni jonlantirishdir.”
Aktyor bolalik joylarini ko‘rganida otasining qanday jonlanganini alohida ta’kidlagan.
Kris uzoq vaqt davomida bu qadar shaxsiy mavzuda film olishga ikkilanib kelgan, ammo oxir-oqibat bunga qaror qilgan. Otasi ham uni qo‘llab-quvvatlagan.
“Men Altsgeymer mavzusidan foydalanib, otamni noqulay ahvolga solishni istamaganman. Ammo bu haqda gaplashdik va u shunday dedi: ‘Balki bu muammoga e’tibor qaratib, odamlar uchun foydali bo‘lar. Yo‘l davomida o‘zimiz ham nimanidir o‘rganarmiz.’”
Suratga olish jarayonida Kris otasini yangi tomondan kashf etganini tan oldi — nafaqat ota sifatida, balki shaxs sifatida ham. Shuningdek, u otasi bilan his-tuyg‘ular haqida ochiq gaplasha olgan.
“Uning eng katta qo‘rquvi — boshqalarga yuk bo‘lib qolish. Buni eshitish yurakni ezadi. Suratga olishdan oldin men hatto uning nimalarni his qilayotganini ham bilmasdim, chunki bu haqda so‘ramagan ekanman,” — dedi aktyor. Hozirda Kreyg Hemsvort eski xotiralarini saqlab qolgan va odamlarni taniy oladi. Asosiy muammo esa qisqa muddatli xotira bilan bog‘liq.
