Bugun Gollivudning eng mashhur va sevimli aktyorlaridan biri — Jim Kerri tavallud kunini nishonlamoqda. U yaratgan obrazlar nafaqat tomoshabinlarni kuldirgan, balki butun bir davr ruhini aks ettirgan rollar sifatida kino tarixida muhrlanib qolgan.
Jim Kerri o‘ziga xos mimikasi, betakror energiyasi va sahnadagi erkinligi bilan komediya janriga mutlaqo yangi ohang olib kirdi. Aynan shu jihatlar uni qisqa vaqt ichida dunyo miqyosidagi yulduzga aylantirdi.
Aktyorning ilk katta muvaffaqiyatlaridan biri «Eys Ventura: uy hayvonlari detektivi» filmi bo‘ldi. Ushbu obraz Jim Kerrining ijodiy uslubini keng ommaga tanitdi. Oradan ko‘p o‘tmay, «Niqob» filmi ekranlarga chiqib, aktyorni butun dunyoga mashhur qildi. Undagi harakat, plastika va hazil tomoshabinlar xotirasida hanuz unutilmas bo‘lib qolmoqda.
Shuningdek, «Ahmoqdan ahmoqroq» kartinasi Jim Kerrining eng mashhur komediyalaridan biri sifatida e’tirof etilib, 90-yillar kino ramziga aylandi.
Biroq aktyor faqat kulgi bilan cheklanib qolmadi. «Truman shousi» filmi uning ijodida muhim burilish yasab, Jim Kerrining chuqur va falsafiy rollarni ham mohirona ijro eta olishini isbotladi. Ushbu film tomoshabinlar va tanqidchilar tomonidan yuqori baholandi.
Keyinchalik «Oydagi odam» hamda «Beg‘ubor ongning abadiy nuri» filmlari orqali aktyor o‘zining dramatik qirralarini yanada ochib berdi. Bu rollar Jim Kerrini nafaqat komediyachi, balki jiddiy san’atkor sifatida ham tanitdi.
Bugun aktyorning filmlari turli avlod tomoshabinlari tomonidan qayta-qayta tomosha qilinmoqda. Uning ijodi hali ham o‘z dolzarbligini yo‘qotgani yo‘q.
Jim Kerrining tug‘ilgan kuni munosabati bilan muxlislar uning eng yorqin va sevimli rollarini yana bir bor eslab, aktyorga bo‘lgan muhabbatini izhor etmoqda.
