Mashhur K-pop guruhi BTS 2026–2027 yillarga mo‘ljallangan jahon gastrol turini rasman e’lon qildi. Ushbu turne harbiy xizmat sababli yuzaga kelgan tanaffusdan so‘ng guruhning yetti nafar a’zosi to‘liq tarkibda sahnaga qaytishini anglatadi.
Gastrol safari 2026 yil 9 aprel kuni Janubiy Koreyada boshlanadi va qariyb bir yil davom etadi. Shu vaqt mobaynida BTS Osiyo, Yevropa, Shimoliy va Lotin Amerikasi, Avstraliya hamda Okeaniya davlatlarida kontsertlar o‘tkazadi. Rejaga ko‘ra, 30 dan ortiq shaharda qariyb 80 ta chiqish bo‘lib o‘tadi, bu esa guruh tarixidagi eng yirik turnelardan biri hisoblanadi.
Guruhning sahnaga qaytishi yangi studiyaviy albom chiqarilishi bilan bir vaqtda amalga oshiriladi. 2026 yil bahoriga mo‘ljallangan ushbu albom BTSning so‘nggi yillardan buyon ilk bor to‘liq tarkibda taqdim etiladigan musiqiy ishi bo‘ladi va u allaqachon butun dunyo muxlislarining katta qiziqishini uyg‘otmoqda.
Kontsertlar asosan yirik stadionlarda o‘tkaziladi. Tashkilotchilarning ma’lum qilishicha, shoular zamonaviy texnologiyalar asosida tayyorlanadi va 360 darajali sahna formatidan foydalaniladi. Bu tomoshabinlarga joyidan qat’i nazar, konsertni to‘liq his etish imkonini beradi.
Tur doirasida BTS Seul, Tokio, London, Parij, Madrid, Los-Anjeles, Nyu-York, Chikago, Toronto, Mexiko, San-Paulu, Buenos-Ayres, Sidney va Melburn kabi yirik shaharlarda chiqish qiladi. Shuningdek, Janubi-Sharqiy Osiyodagi bir qator shaharlarda ham kontsertlar rejalashtirilgan.
Chiptalar savdosi 2026 yil yanvar oyida boshlanadi. Avvaliga rasmiy ARMY fan-klubi a’zolari uchun maxsus oldindan sotuv tashkil etiladi, shundan so‘ng chiptalar umumiy savdoga chiqariladi. Mutaxassislar chiptalarga bo‘lgan talab juda yuqori bo‘lishini va ayrim kontsertlar qisqa vaqt ichida sotilib ketishini taxmin qilmoqda.
