Amerikalik pop xonanda Bruno Mars uzoq kutilgan yangi albomi tez orada chiqishini ma’lum qildi.
San’atkor bu haqda o‘z blogida xabar berib, qisqa va lo‘nda tarzda: “My album is done” (“Mening albomim tayyor”) deb yozdi. Xabar qisqa bo‘lishiga qaramay, muxlislar orasida katta qiziqish uyg‘otdi va ijtimoiy tarmoqlarda faol muhokamalarga sabab bo‘ldi.
Bo‘lajak reliz Bruno Marsning deyarli o‘n yil ichidagi ilk yakkaxon studiyaviy albomi bo‘ladi. Uning avvalgi plastinkasi — 24K Magic, 2016-yilda chiqqan bo‘lib, juda katta muvaffaqiyat qozongan, keng e’tirof etilgan va bir nechta nufuzli mukofotlar, jumladan “Gremmi” bilan taqdirlangan edi.
So‘nggi yakkaxon albomi chiqqanidan keyingi yillarda Bruno Mars asosan qo‘shma loyihalarga e’tibor qaratdi. 2021-yilda u Anderson .Paak bilan birgalikda yozilgan An Evening with Silk Sonic albomini taqdim etdi, 2024–2025 yillarda esa Ledi Gaga hamda “BLACKPINK” guruhidan Rose bilan mashhur treklar yaratishda ishtirok etdi.
