Apple Music musiqiy striming platformasi 2025-yil yakuni bo‘yicha eng yaxshi pop qo‘shiqlar ro‘yxatini e’lon qildi. Reytingga jami 50 ta kompozitsiya kiritildi, kuchli uchlikda esa ayollar peshqadam.
Birinchi pog‘onani Ledi Gaga o‘zining ijtimoiy tarmoqlarda mega hit bo‘lgan “Abracadabra” trekida qo‘lga kiritdi. Turli platformalarda foydalanuvchilar xonanda va uning jamoasining raqs harakatlarini takrorlab ko‘rishga harakat qilishdi. Apple Musicga ko‘ra, Ledi Gaga 2025-yilda yana bir bor barcha davrlarning eng buyuk san’atkorlaridan biri ekanini isbotladi.
Ikkinchi o‘rinni Sabrina Karpenterning “Manchild” qo‘shig‘i egalladi — unda munosabatlarga tayyor bo‘lmagan, javobgarlikdan qochadigan yigit obrazi tasvirlanadi.
Uchinchi pog‘onani esa kanadalik xonanda Teyt Makreyning “2 hands” taronasi band etdi.
